Liberté, égalité, solidarité, fraternité et justice.

2011-09-16T08:06:00.000+02:00

Xulka heesaha iyo falanqeynta Saida VIP

Looxa qormooyinka, abwaanka, fanka, fannaanka, hal-abuurka, maqaalada, suugaanta iyo xikmadaha.

2011-07-29T15:12:00.000+02:00

Sharraxaa la tummaayee maxaa sheekada keenay? WQ: Saida Sheikh Ahmed

2011-07-25T04:24:00.012+02:00

Looxa 25/07/2011

Dad xeyn xeyn u socda, sawaxan, sacab, jiib iyo farxad dadku waa wada faraxsan yihiin wixii dhibay baa laga dul qaaday, waa loo bogayaa, waa la rabay, waana la isku wada hambalyeynayaa si kal iyo laab ah, natiijadu haba noqotee mid aan lagu farxin, haddana in loo baahnaa wey la tahay dad badan oo caddaalad darro tirsanayey, aan hadalka kala qalee magaaladu wax badan sheekadaba kalama socoto oo dadkii magaalada dadkoodii oo kasoo yaacaya gobollo kale ayaa u sharxaya wixii dhacay, waxa socda iyo sideey wax u jiraan, iyadu waxbaba ma oga, wey iska dhabaqsanaysaa waxa socda, sacabka un ba ayay ku biirineysaa, Allaheed Alle, waa ka reer magaalnimo, waa ka; waxa isku day inaad fahanto, oo yaan laguu arag inaad ka dhacsan tahay, oo maxay uga dhacsaanan weysay, ma iyadaaba wareer aragtay? Golleheeda sare; Baabba Macoow Awdiinle, Dr. Raafi, C/dir Nuuraani, Axmed Naaji; C/dir Sayid Sajan, Axmed Shariif, Axmadeey Cabdi Gaashaan, Cali Cismaan Daroog, Faynuus Sheekh Daahir, Xaaji iikar Leeb, Shariif Jeeg, Maarisa Karbooni, Sahra C/dir “Sahruuja”, Khadra Dheer, Dr. Maxamed Iikar, Maxamed Cabdoow, Maki Xaaji Banaadir, Odey Cabdulle, Kuuku Cadde, Koombe, Aweys Khamiis, Sulfa, Killer, Sitteey Qosol wanaag, Maryan Naasir Cali, Luul Jeylaani Cali, Shimaali iyo qaar kaloo badan bay la heysatayee, maxayba uga baahan tahay wax kale? iyadu raaxeey taqaan, oo kool koolin baa la barayee, Sow ta ganbaalle loo gaday oo gareyskeedeey xirneydee. Ma iyadaaba xittaa ka warqabta dawladda jirtay nooceeda iyo waxay tahayba? oo miyaysaba u baahneyd in ay ogaato? inta ay heysataa ku filnaadee, golaheedaa saraa deeqayee oo kaba badnaa boqolaalkee.

Duweetto: Abwaan C/Dir Sayid Sajan

Bayd 1 Aweys Khamiis:

Xornimmaan helnee;

xaajadeen waa samaatee;

aan soo xashaashnee;

xafladeenna waayee;

xubbigeenna xusnee;

xishoodka dhaaf;

xaggeey imaaw;

aan xarakoonnee.

Koore: Sitteey

aan xaroonee;

xarunteenna aadnee;

xididkeey dhaxdii;

xaaddeey waa dhaqaaqdee;

xabadkaa i saar;

xabadkaa i saar.

Bayd 2 Sitteey

Xubbigii haddaanaan;

xalkiis gaarnayee;

xis aan yeelanee;

xijaab mana dhex yaallee;

xaas waa nehee;

xayaatadeey adaa ehee;

ila xadreeyee.

Qiiq, qaaq, waxaad aragto xad ama jabi, waxaba adiga ma aha waxaagee waxba ha u reebin, saad doonto yeel iyadoo taas la yaabban, oo meel ay u qaaddo garan la’, waaba ta soo dhaaftay. Dhin dhin shabkax, miskiinta haddana indhahaa bannaanka yimid, waa mar kalee ma taqaanno maqaayado shaah iyo heeso kaban ah; mana taqaanno luuqadahaan cusub ee maalmahaan soo biiray ee meel kastaa ka socda, sheekooyinkaan waa ku cusub yihiin, way yaabban tahay, laakiin waxay isku dayeeysaa in ay la qabsato oo ay barato, laakiin wali waa ku adag tahay. Ma xumma oo in ay is aqbalaan iyadu waxa ay taqaanno iyo waxa kalee kusoo biireyba, waa waxbarasho faa’iido leh, quruxdaa ku jirta in ay isla socdaan. Tartanka caafimaadka qabaana waa mid mar kastaa loo baahan yahay, se in la is boobsiiyaa oo is riix riix suuqa la iska saaro iyadoo la adeegsanaayo tabo ama habab ka baxsan xeerarka tartanka caafimaadka qabaa waa halkii gabar walaasheey ah oo aan aqaannee It is not nice.

Quruxdeeda ka sokoow, reeraha uu dhaqaalahoodu wanaagsan yahay iyo kuwa uu liitaba way iska faraxsan yihiin, iimaankoodeey qabaan, waa halkii Wiil Waal ee; Illaahay ammarkii, cidna caban meyso, qof kastaa wuxuu sugayaa wixii uu Illaahay u qoray, jawiga iyo hawada fiican dadkoo dhan ayay ka qoslinayaan, dhoolo caddeynta hagar kuma jirto oo ma ahan kaliya afkaaga kala jiid ha laguu jeedee, dadkuna waa dad qurux badan, isbaddal kuma dhicin, markiiba waad garaneysaa in ay yihiin dadka rasmiga ah oo meesha lagu yaqaannay, labbiska ma ahan mid cirka kasoo duulay ama meel kale laga keenay ama ay bilaash xeyteyaal aan waxba ka garaneyn dhaqankeeda iyo kan guudba ay suuqa soo galiyeen iyagoo iska dhigaya in ay wax walbaa daadsheen, inkastoo illeyn meeshu waa magaalee hardanka dhaqamada iyo is riix riixa uu muuqanaayay, marnaba meel lagama waayo bilaash xeeytee, waase laga adag yahay. Xaaladda wey ka baddalan tahay midda maalmahaan lagu dawaqsan yahayee jaho wareerka leh, oo aad ku dhex hallaabeyso waa halkii reer Jabuutiyee, ama aad ku dhex wareerayso, oo inta aad is weyso aad leedahay HORTA YAAN AHAY ? Cudurka “Horta yaan ahay? Beryahaanba weerar buu yahay, oo xaajadii weey soo dhaaftay HORTA YAAN AHAAN JIRNEY iyo YAAN NAHAY cudurkaasise weli looma war hayo xittaa inuu aqoonyahankii ku dhacay, oo tartan uu galiyay yaab leh, lagama war hayo inuu qof kastaa la il daran yahay. Suga bal aan halkii ku noqdee, yaan idin wareerinee. Maya kala dheer wax walbaa gacantaa lagu hayaa, dad aqoon u leh oo og waxey qabanayaan ayaa hormuudka ah, is barbar yaac ma jiro, ammuurtu wey hag tahay, wayna hagaagsan tahay.

Quraacdoodii bay cuneen dhammaan intii uu Alle maalintaas u qoray, gabdhihii baa markaan isku diyaarinaya in ay suuqa ka soo adeegaan, oo qado karinta ayaa madaxa lagu wada hayaa, hooyo dhaaxaa ayaa guntiga gareyskeeda ka soo fureysaa xooggaa qarash ah oo lagu soo adeego reerka, ha is oran oo reerkoo dhan miyay wada fadhiyaan? Maya anaa kuu sheegayee qaar baa iskuulada ku maqan, qaar waa galableey, qaarna waa subaxleey, iska jir ha ku qaldammin, qaarkiin baase ila daawanaya hab u socodka filimka iyo sida uu xaalku ahaa, marka yaan innagu daahinee aan dhibicda abbaaro, waa tii la isku sheegi jirey “Hadal badan haan ma buuxshee” inkastoo aniga iyo dad ila mid ah ay maahmaahdaasi dhibeeyso oo waxaanba jecel nahay inaan goobaha ka sheegno maxaa na loo aamusinayaa? hadal baaba noo hanti ah’ e. Ka warramma haddaanba hadalka naftiisa haan ku buuxinno ? illayn waan karnaayee. Waxba heygu qoslinee aan ka soconno, waxba yaan idiin hambo hambeyninee, sheekada oo dhan waxay mareysaa yar yarkana in ay heedhe ku taagan tahay caawa iyo filimka Hindiga ah ee socda iyo guriga laga daawan doono, aan dib kuu yar xusuusiyee waxaa jiri jiray guryo dariska ah oo laga daawado aflaanta Hindiga ah oo iyagu ka faa’iida xoogaa yaroo lacag ah, oo uu u yaallo miraayadda wax laga daawado (TV) oo mid yar ah iyo makiinada rogta cajaladaha lagu xareeyay aflaanta ee isku xirta iskuna gudbisa bacaha cajalka iyo malaha fiilooyinka shaashada wax laga daawado. Albaabka lacag yar ayaad kusoo gashaa, dhulka haddaad fariisato waa lacag la’aan, haddii ganbar aad isku doonato waxaad ku biirneysaa xoogaagii soo galista albaabka xoogaa yar lacagtii kummiyada ahayd ama marba marka ka danbeysa waa iyadaa sii duuleeysayee shillimaadka gaareeysay, haddaadse kursiga gadale ee wax walbaa si wanaagsan looga arkaayo aad isku doonato waa lacag xoogaa ah oo inaad duqda guntigeedda kasoo xaddo maahee aadan heli karin ama intaad albaabka istaagto aad adeeradaa iyo abtiyadaa ama xigaaladoo dhan aad mid mid ugu tiraahdo ii dhiib, laakiin xal kale ma jiro oo waadba yar tahay. Odeyaasha waaweyn waxaa ku taagan shineemooyinka iyo aflaanta Talyaaniga ah, qoloba wey taqaan halkeey u socoto, se dhallinyarada waxaa madaxooda ka sii guuxaya sheekadii xalay ee looga sheekeeyay saakay iyo wixii warbixin laga bixiyay caawa ayay kulul yihiin, dalabkii tikidka waa sii maqan yahay, qaar kalena wax kaleba cid ma su’aalaane, si fudud, warkooduba waa maxaa socda ?

Magaaladoo dhanba jadwal bay leedahay oo lagu wada socdaa, wax kastaa qorsheysan, cid iska socotaa ma jirto, illeeyn meeshu waaba magaalee yaa iska socon kara qorshe la’aan adigaba is weydiiyee.

Qaarka iskuulka jira, qaarka jaamacadaha jira, qaarka guryaha jooga, iyo qaarka shaqeeyaba intooba waxaa ay mid ka yihiin caaweey kulul yihiin, waaba ceeb haddey ku gafto oo lagaaga sheekeeyo.

Waa safaf dhaadheer oo kumaan kun aad ugu timaado, oo haddii aysan jirin qof aad meesha ku leedahay oo guriga kuugu keena aad ku qasban tahay inaad safkaas ku jirto, gabdhaha qaar wey nasiib badan yihin oo wiilasha ay haasawe wadaagga yihiin ayaa isku xariifiya oo BOOLO XOOFTO gurigaa loogu keenaa.

Haa, waan arkaa, waad ila qabsan la’adahay, aan kuu fududeeyo, waxaan ka hadlayaa wali waa tikidka. Lama oga in ay 3 billood oo xiriir ah socon doonto, laakiin qof kastaa wuxuu rabaa in uu ugu horreeyo, waxey kuugu qaadataba, maxaa yeelay sheekada magaaladaba waxey ku kooban tahay; iskoolkee dhigataa? Ciyaal Bartamaha ayaan noqon doonaa dugisgeyga sare, dugsigaaaga hoose, Ditooradda ka warankeed, macallimiintaada, rajadaada wax barasho iyo jaamacadda aad tagi doonto, ma Biibbi baad noqon doontaa, mise jaamici? Iyo goobta aad u shaqeyso. Sheekaba waa mid la xiriirta guud ahaan iskuuladda iyo waxbarashada, arrimaha haasaawaha, iyo Tiyaatarka oo ah xarigga kaliya ee bulshada isku hayay.

Kama hadlin dadka kor ka yimid waa magacii lagu oran jirayee, maahan mid aan anigu abuurayee, iyagu waxey tagi jireen riwaayadaha subaxdii la dhigo ee siyaasadeysnaa oo waxey aad ugu dhex noolaayeen siyaasadda, qaarna wey dulmanaayeen oo siyaasadda in ay la socdaan dantaa ku qasbeysa, se dadka magaaladaa wixii ka baxsan, magaalada iyo agagaarkeeda waxba umaba war heyn, oo dhankaa iyo Waqooyi wixii ka xigaba uma heystaan in ay isku waddan yihiinba, maxaaba loola yaabi? ama dacwaba loogu qasban waaba ka daacadee, weyska xaal caasimadeede AGGAH.

Waxaa dhagsan riwaayaddii ugu wakhtiga dheereyd inta ay socotay waa Sharraxii la Tummaayay Sheekaa ka danbeysay oo soconeysay 3 billood ku dhan, oo Fanka Banaadiriga kaligii baa ah hagaha iyo hormuudka magaalada, dadka oo dhanna ku abuurayay xasil, una ahaa jid bixiye maskaxeed iyo kobciye garaad, kor u qaade garasho, dhisaha dammirka bulshada.

Cabashada, ciilka, colaadaha iyo is nacaybka waa laga weecinaayaa bulshada, waxaa loo abuurayaa murti iyo madadaalo sidii faleebbada ugu socon karta, oo xumaha ka reeba ah, oo samaha ku haga ah, oo u hayay wax aysan dawladi u heyn, ama aysan uba heli karin.

Magaaladu halka luuqad ay taqaannaa ayna wax ku fahantaa waa kaliya fanka Banaadriga, heesaha iyo riwaayadahaba. Magaaladu ma taqaanno gabay, mana taqaanno sheekooyin kale iyo hab kaloo wax ay dadku iskugu gudbiyaan, shaqo kuma lahan bari baa waxaa jiri jiray, dhagaheedu uma daloolaan odey hebel waxaa laga hayaa bari ama qudbooyin dhaadheer IWM. Markiise ay kooxo cirka kasoo dhacay ay afka qabteen dadkii ahaa hoggaanka rasmiga ah, goleheedii sare, oo magaalada luuqadda ay ku hadasho ay wax ku fahanto iyagu si rasmi ah iskugu xilqaami jiray la cabburiyay, oo lagu qasbay iney afkooda xirtaan, qaarna cabburinta darteed iyo calool xumada ay iilkaba uga hoydeen maxay noqotay natiijada ka dhalatay? Miyeynan kula ahayn tan maanta ay meel kastaa Soomaaliyi la barooratay oo calaacalka un uu uga soo haray.

Magaaladu waxay dooneysaa, oo ay codsanaysaa in loo doono raggi iyo dumarkii hagi jiray, oo garanayay sida ay ku xasilin karaan, luuqaddii kaliya ay dadka ku nool isku af garan jireenna in loo soo celiyo ayay dalbaneysaa, boqolaalkeedii Golaha sare in loo doon doono ayay ku qeylineysaa, oo xariggeedii loo xiro, waxey taqaanna loo helo, waxeedii wax aan ahayn in ay ku adag yihiin in ay la qabsato 20 sano ayay ku gaartay, kuwo cusub ee gadaal ka yimidna waxey leedahay ha la baro in ay xariggaas qabsadaan, oo dhaqan toosin ha loo sammeeyo, oo lagu xiro dhaqankii ay lahayd magaaladda.

Wiil u eg Axmed Mooge WQ: Saida Sheikh Ahmed

2011-07-24T04:45:00.000+02:00

Looxa 24/07/2011

“Ama horay ayaad u badatay (Duq baad tahay) mise ilbax ma tihid wali” ? Maalin kastaan maqlaa. Reer Baadiye ayaad tahay ayaa la ii daba dhigaa, haddaan qoraalka ku dhex qoslo waad ila yaabi doontaan mise waxaad iga sugaysaan inaan sida shabakadaha xiriirka bulshada sida looga qoslo aan anna ugu qoslo qoraalka? kkkkkkk maad iga sugeysaan? MAYA qoraalka laguma daro qosolka sidaas ah, ha ka yaabin, laakiin waxaan kuu sheegayaa inaan fuuray qosol dartii .

Axmedoow, waxaan kugu doortay baaba ah sida aadan iskaga dhigin dad kale, kaligaa baa isku muuqda, waad isku kalsoon tahay, sida aad reer baadiyenimadaada ugu qanacsan tahay ayaanba ka helay, xittaa adigoo wax bartay, isku kalsoonaan ayaa wajigaaga ka muuqata.

Alloow Alle, Axmedoow gacale, maxaa la iska og yahay ?

Soow kulama aha in ruux walbaa la siiyo xaqa uu leeyahay iyo xuquuqdaba? Gacaloow, soow ruux walbaa doorasho ma laha? waa iga talee, may naga dhaafaan in dacalka la is heysto, sow kulama aha in aan qof walbaa dooqiisa iyo xornimadiisa lagu maxkamadeyn, caqliga wanaagsan soow sidaas kuma qeyliyo ina adeer?

Gabar aan garanaayaa igu tiri waa cawaandi, Axmedoow gacale, waxba ha yaabin, anigaba waan iska qoslayee, maxaadba iskugu wareerin, maxaa yeelay anigaba waa isoo martay bari aan wax kastaa dhihi jiray waxaas waa laga ilbaxay, haddase waxaan is weydiiyaa oo ma adiga ayaa iska ilbixi kara ? adiga, adiga lee waaye, iskama ilbixi kartid ayaan isku sheegaa bal wax ka dheh. Waa saasoo aan magaalo ku dhashay, haddana nasiib markaan u yeeshay inaan dadka kalena waxooda aan soo barto, waxeyga magaalada aan heysto indhahaa ii waaweynaaday.

Axmedoow, kuma lihi magaalo ma aadan arkin se adiga ayaa adiga ahaa, qof kale ma ahayn, xittaa haddii laguugu yiri wax ka matal riwaayad aad ku mataleyso nin dhaqanka diid ah, oo iska dhigaya dadyoow kale weli waxaa kaa muuqday Axmed Moogenimmo, waana sii jeclaaday Axmed Moogenimadaada.

Wajigaagu wuxuu ii sheegaa inaad tahay qof wanaag u dhashay, oo Illaahay iyo umaddaba ay jeclaadeen, waxaan kaa arkaa nuur saa’id ah, waad igu weyn tahay, habeenno badan ayaad ii nuurisay adduunkeyga si aysan iigu nuurin karin Justin Timberlake, 2Pac, Eminem JLO iyo qaar kaloo badan, wax badan ayaan ka bartay muuqaalkaaga ku xareysan Youtube ka.

Waxaan kaa helaa nasteexo iyo hawo caafimaad markaan dhageysto heesahaaga, waxaana oran karaa mugdiga ayay iga saaraan, mar mar baan jecleystaa inaan kuu heeso markaaga, haddana waxaan kuugu baddalaa duco iyo ammaan, gacaloow Illaahay janno ha kusiiyo.

Axmedoow, waxaan isku dayay inaan bal raadiyo inaan dunida ku arko wiil Soomali ah oo kuu eg, oo labbiskaaga, qabkaaga, dadnimadaada iyo quruxdaada leh si aan ugu soo faano ama aan ugu soo faano bulshada aan la noolahay, se waan soo waayay, nasiib xummo, kulli waxey iska dhigayaan dadyoow kale oo ummado kale ayay isku dabo qoraayaan.

Gacaloow, ugu danbeyntii ayaan go’aansaday inaan aniga nafteyda isku kaa ekeysiiyo oo aan timaha u jarto sidaada, shaarkaaga loo aqoon jiray shaar reer baadiyena aan xirto, maxaa yeelay aniga ima hureyso inaan muuqaalkaaga quruxda aan u arkee aan jeclaystay aan ka faa’iideysto, si aan aniga iskugu faano oo aan isku dareemo, dad badanna aan irdaha xoriyadda ugu ballaaqo.

Qaaligeeygoow, walaalkeyoow, wax badan inaan kaa reebto ayay iila ekaatay ilbaxnimaduba waa tan aan anigu aaminsahayee. Waxaana billaabayaa inaan kuu ekaado laba bilood kaddib hadduu Alle nafta igu simmo.

Xerada Foolaadka Bulshada! WQ: Saida Sheikh Ahmed “VIP”

2011-01-28T15:15:00.004+01:00

Looxani waa la tiiriyay waana la xifdiyay

Haa, aniga iyo adigu waa sideynu ku hishiinnay, af daboolan dahab, sidaas baan wax u qarsanaynaa waligeen, haddii kale in la is dilo ka yaab, oo mid xeyraansan oo ku dilo ama uu na dilaba, ama koox Qaad kasoo dharagtay oo mirqaansan ay xalka moodaan inuu kufsigu yahay dawo, ama mid iska maxabbeysay uu tooreey kuugu kala jeexaba, intuu yiraahdo cimrigey intaan noolaa ismaan lahayn waad arki doontaa ama hadduu rababa uu isagu is dooxo, isagoo innagaga dhigaya inaan dunida na lala joogi karin ama ay habboon tahay in dunida naloo banneeyaba, kan ugu roon baa ku dhihi kara“Cimrigaagoo dheeraada geel dhalaayaas ku tusaa”

Cidna ma jecla in ay il-biriqsi ka fekerto toloow maxaa wacay? Maxaa keenay? Se innagu hishiiskeenna waa xaalka hadda meesha ka jiree, waa hishiis wanaagsan, dad badan oo bulshada safka hore uga jira ayaa nala mid ah, waxayna ku joogaan hishiiskaan oo kale, gudaha dalka iyo debadda ayaa laga helaa dad nala mid ah, oo hishiiskaan ku jooga. Heblaayo tii cirka iyo dhulka kala heysay ma xasuusataa? iyada xittaa hishiiskeey ku jirtaa, kii isagana ahaa aftahanka isna wuu ku jiraa hishiiska, meesha waa laga buuxaa.

Wey noo fiican tahay annaga taas, jaanis waaye. Maalin kastaa intaaseey isku qanciyaan.

Illeyn bulshada kuuma oggola doorashadaada, horaa heyb sooca looga maaro waayay, xanta iyo war iska sheeggana waa looga daawo la’yahay, dagaalka iyo colaadahana si Allaale iyo si laga yeelaa la weysan yahay, Qaadkana wareerkiisa wuxuu saameeyay guud ahaan horumarka bulshada, haddana waxaa dheer intaasoon wax laga qaban ayaa lagu mashquulsan yahay in annaga wax nala ka qabto, oo qof walbaa dhagahaa u taagan, markuu innaga na maqlaa hadduu waligii hadlin xittaa amay waligeed hadal maalintaas bay hadaaqaan. AGGAH maalintaas bey hadaaqaan.

Waa xero lagu kulansan yahay? laakiin sharcigeedu waa; cid kastoo aad kusoo aragto inaadan sooba hadal qaadin, ma sheegi kartid. Sidee baad u sheegeysaa? Adigii oo ka mid ah horjoogeyaasha bulshadaaba xerada tagayee, ma kuwa joogee kaaga sii xariifsan hormuudnimada bulshadaad ka hadli kartaa? waaba ceebe…. Soow adigaagan ka mid wax-garadka bulshada? Ma wax garadka kula midka ah baad soo sheeg sheegi kartaa? Maya xishoo,waa laga fiican yahayee…

Yaan la is qar qarxin waa kelmadaha xerada, meeshu waa xero mugdi ah, waxaana ka dhex buuxa tiro badan oo ah kuwii bulshada u daarayay nalalka ama leydhka, HOOBBALAA haddana HOOBBAALAA, mugdi haba ahaatee waxa hees ka yeeraya ma rumeysan kartid; Ma Christina Aguilleraa? Ma Elton John baa? Mise qaar ka mid ah fannaaniinta cusub ee Soomaalida ee heesahooda ay gali karaan xero kastaa?

Mudigeedaba ha ahaatee waa la mahdinayaa in lagu dhuumman karo oo la isku qarin karo, qaar baaba leh; yaa meel lagu dhuuntaa iftiinkeeda wax ku falaya Waaba meel lagu dhuuntee? qaar baase su’aal kale ka hor geeya oo leh annagoo ah foolaadkii bulshada u daarayay nalalka haddii aan mugdiga ku jirno maxaan gaarnay? taa ma garashaa?

Nux Nuxda xerada:

Hoosh haddaan ku qaadno darbigaan Berlin hal dhagax kamuu hareenee

hadalka haddaan ka deyno hees hawleed ku jabinno hal dhagax kamuu hareenee

hoobeyda jiibta haddaan isla qaadnoon u kala harin hal dhagax kamuu hareenee

hal hal u socodkiyo haddaan dhaafno isku qarinta hooska hal dhagax kamuu hareene

halahaan nahay iyo halaheey yihiin haddii laysku daraa tirada weysku heeree

hoggaan wacan ma noo hesheen hor kaca duullaankoo himiladeena raadshaa?

Kuwo kalaa madaxa ruxaya oo hoosta kaga guuxaya waa qasab in ay bulshado na aqbasho, illeeyn haddii aynu nalal u daarney waa caddaalad darro inaan innaga xeradaas mugdiga ah ku oodnaannee WEGER!

Xeradaas ay ku jiraan tiro badan oo foolaadka bulshada ah nal kama daarna inkastoo ay qabaan qaar badan in haddii bulshada nalka ay ka dammiyaan ay mugdiga ka ugaarsan doonaan, haddii nalka la wada daartana Mooyi waxa dhici lahaa adiga garo, kolleey aniga waxaan soo arkay oo aan hubaa in ay foolaadka bulshada badankood ay ku xareysan yihiin xeradaas mugdiga ah ee sida fuleynimada leh hoosta looga guuxo, markii bannaanka loo soo baxana sida af-maalka loo hadal yaqaanno, ama sida geesiga birta loo calashaday. Dhuudhuumashoow ama Kaddimeey kaddim koow, kaddimeey kaddim laba, kaddimeey kaddim saddex………………….

Qoraha Saida VIP